Monday, June 28, 2010

“እስክንድር ከሆንክ እንደ እስክንድር ተዋጋ፤ ካልሆነ ደግሞ ስሙን መልስ”

December 23, 2009 በደጀ ሰላም  ላይ አቅርቤው የነበረ ጦማር ፦በሰሜን አሜሪካ የኢ/ኦ/ተ/ቤ ካህናትና ምዕመናን ጉባኤ መግለጫ ሳነብ የተዘበራረቀ ስሜት ተሰማኝ። ምክንያቱም በዘንድሮ ጉባኤአቸው ላይ ታሪካዊ ውሳኔ ያሳልፋሉ ብዬ ጠብቄ ነበረ። እነዚህ በተለያዩ ግዛት የሚገኙት አጥቢያ ቤተ ክርስቲያናት በአስተዳደር ብልሹነት ምክንያት የአቡነ ጳውሎስ አስተዳደር እንደማይቀበሉ፤ ነገር ግን የቅዱስ ሲኖዶስ ውሳኔዎች እንደሚቀበሉ በተለያዩ መድረኮች ሲገልፁልን ቆይተዋል። የእግዚአብሔር ፈቃድ ሆኖ በአንዳንድ ብፁአን አባቶች አማላካችነት ቤተ ክርስቲያናችን ከብልሹ አስተዳደር እንድትፀዳ ጥያቄው ቀርቦዋል። ይህም ጥያቄ በሒደት ላይ መሆኑን በተለያዩ የህዝብ መገናኛ ብዙሀን ሰምተናል። ታዲያ ችግራቸው የአስተዳደር ብልሹነት ከሆነ ጥያቄው አሁን በውስጥም ስለተነሳ “እኛም ከዚህ በፊት ያነሳነው ጥያቄ ስለሆነ ከእናንተ ጋር ነን፣ አብረንም እንዋጋዋለን” በማለት ግልፅ የሆነ ውሳኔ ለምን አላሳለፉም?።

እንግዲህ እነዚህ ተሰባስበዋል የተባሉት “ገለልተኞች” ነን ከሚሉት አጥቢያ ቤተ ክርስቲያናት መሀከል በአንድ ቡድን የተሰሉፉ ናቸው። እዚህ ሰሜን አሜሪካ ውስጥ በይፋ የሚታወቁ ሶስት የአስተዳደር ዓይነት ያላቸው በኢ/ኦ/ተ/ቤ ስም የሚጠሩ አሉ። እነሱም “ገለልተኛ”፣ “ስደተኛ ሲኖዶስ” ነኝ ብሎ ራሱን የሚጠራው አስተዳደር የሚቀበሉ እና በኢትዮጵያው ቤተ ክርስቲያን አስተዳደር መዋቅር ስር የሚተዳደሩ ናችው። ይህ በስም ሶስት የአስተዳደር ዓይነቶች ምዕመናን ሁላችንም የምናውቀው ሲሆን፤ በውስጥ ግን እያንዳንዱ አጥቢያ ቤተ ክርስቲያን የራሱ የሆነ አስተዳደር እና የራሱ የሆነ ልዩ ፀባይ አለው።

ከዚህ በፊትም በዚሁ በደጀ ሰላም አስተያየት መስጫ ላይ እንደገለጽኩት እዚህ እኔ በምኖርበት ዋሽንግተን ዲሲ እና አካባቢዋ ማለትም ዲሲ፣ሜሪላንድ እና ቨርጂኒያ ላይ 18 (አስራ ስምንት) በኢ/ኦ/ተ/ቤ ስም የሚጠሩ አጥቢያ ቤተክርስቲያን ይገኛሉ። ከእነዚህም ውስጥ ስድስቱ “ገለልተኛ” ከሚባለው አስተዳደር የሚመደቡ ሲሆን፤ ነገር ግን ስድስቱም የራሳቸው የሆነ ልዩ ፀባይ እና እንዲሁም አስተዳደር ዓይነት አላቸው። ነገር ግን “ገለልተኛ” የሚለው ስም ብቻ አንድ ያደጋቸዋል። ከእነዚህም ውስጥ አንዱ አጥቢያ ብቻ ነው፤ ሰሞኑን በተካሄደው የካህናት እና ምዕመናን ጉባኤ ላይ የተሳተፈው። አምስቱ ግን አልተሳተፉም።
ታድያ ይህ ቅጥ ያጣ መለያየት መንስኤው ምን ይሆን? እውነት የፓትርያክ ጳውሎስ የአስተዳደር በደል? ወይስ ሌላ ጥቅም ፍለጋ? እንግዲህ “እስክንድር ከሆንክ እንደ እስክንድር ተዋጋ፤ ካልሆነ ደግሞ ስሙን መልስ” እንደሚባለው የኢ/ኦ/ተ/ቤ በማለት ስም ብቻ ይዞ ጉዞ እስከ መቼ?። መልሱን ለእናንተ ትቼዋለሁ።

1 comment:

Anonymous said...

It is so funny, you are arrogant weyane,Are you trying to divide us like your boss? Douche bag,