Monday, June 28, 2010

የህንድ ቤተ ክርስቲያን ለእኛ ምሳሌ መሆን ትችላለችን?

December 19, 2009 በደጀ ሰላም   ላይ አቅርቤው የነበረ ጦማርአንድ አባት በምገለገልበት አጥቢያ ቤተ ክርስቲያን በመድረክ ቆመው የህንድ ቤተ ክርስቲያንን እድገት ምሳሌ እየጠቀሱ ስለ እኛ ቤተ ክርስቲያን እድገት ሲያስተምሩ በጥሞና ተመስጬ እያደመጥኩ አእምሮዬ ወዲያው ጥያቄ አቃጨለብኝ “የእኛ ቤተ ክርስቲያንስ የት ናት”?። እኚሁ አባት ስለምግባባቸው ከመድረክ በኋላ ጥያቄም አቀርብኩላቸው። “ለመሆኑ ዛሬ የተማርነው ትምህርት ለእኛ አጥቢያ ቤተ ክርስቲያን ይመለከታታል ወይ?፤ እርሶ እንዲቴት የህንድ ቤተ ክርስቲያንን በምሳሌነት ሊጠቅሷት ቻሉ”? ብዬ በትህትና ጥያቄዬን ሰነዘርኩ። እሳቸውም “ልጄ ምን ማለትህ ነው?፤ የህንድ ቤተ ክርስቲያን እኮ ከቤተ ክርስቲያናችን ጋር እህት ናት፤ ስለዚህ የህንድ ቤተ ክርስቲያን እድገት ለእኛ ቤተ ክርስቲያን ትልቅ ምሳሌ መሆን ትችላለች” አሉ። ጥያቄን በፈለኩት መልኩ ስላልመለሱልኝ በድጋሚ ማብራራት ጀመርኩ።

የህንድ ቤተ ክርስቲያን በዲያስጶራ አገልግሎቷ ከኛ ቤተ ክርስቲያን ጋር ሲነፃፀር በእድሜ ብታንስም አንድነቷን ጠብቃ በመጓዝ፤ ሐዋሪያዊ ተልኳዋን ዘመኑን በዋጀ መልኩ እየፈፀመች ነው።

እንደውም በሰሜን ምስራቅ አሜሪካ ሀገረ ስብከት ድህረ ገፃቸው ላይ “The American Diocese of the Malankara Orthodox Syrian Church is located in the United States. It is the sub-wing of the Malankara Orthodox Syrian Church in India” ይላል። ጥያቄዬ ‘እርሶም ሆነ እኔ ያለንበት አጥቢያ ገለልተኞች ነን፤ የእነርሱ ግን የሰሜን አሜሪካ ሀገረ ስብከታቸው ህንድ ካለው ቤተ ክርስቲያን ጋር በአንድ ሰንሰለት የተያያዘ ነው። አንድ በሆነ የአስተዳደር መዋቅር ሀያ ስድስት ሀገር ስብከት አላቸው። እናም አሁን እኛ ገለልተኞች ስለሆንን በየትኛው መዋቅር ተገናኝተን በአጠቃላይ ቤተ ክርስትያናችን የህንድ ቤተ ክርስቲያን የደረሰችበትን ለመድረስ መስራት እንችላለን’? ብዬ በድጋሚ ጥያቄን አቀረብኩላቸው። “ልጄ የህንድ ቤተ ክርስቲያን ምዕመናን ጎበዞች ናቸው፤ ሁለት ሆነው አንድ ቤተ ክርስቲያን ይሰራሉ የእኛ ምዕመናን ግን ይኸው ከሺ በላይ ነው፤ እቺን ቤተ ክርስቲያን መስራት አቅቷችኋል ለዛም ነው፤የህንድ ቤተ ክርስቲያን ምሳሌ ያመጣሁት” ብለው መለሱልኝ። ጥያቄዬም ሳይመለስልኝ ተሰነባበትን።

ለመሆኑ ቤተ ክርስቲያናችን አሀት አብያተ ክርስቲያናት የደረሱበት ደረጃ የምትደርሰው መቼ ነው? ይህ የሁል ግዜ ጥያቄዬ ነው። በትንሹ እንኳ ስለ ኢ/ኦ/ተ/ቤ መረጃ ለማግኘት በእንግሊዘኛው “ehtiopian orthodox church” ብለን ጎግል ስናደርግ የምናገኘው በአንዳንድ ግለሰዎች የሚዘጋጁ ድህረ ገፆች እናገኛለን። ከእነዚህም ከምናገኛቸው ድህረ ገፆች አንዳንዶች ለቤተ ክርስቲያን እድገት ተቆርቃሪዎች እንዲሁም ወንጊልን ለዓለም ለማዳረስ አለም የደረሰችበትን ጥበብ በመጠቀም የሚተጉ ወገኖች ቢኖሩም፤ አንድንዶችሁ ደግሞ ከቤተ ክርስቲያኒቱ አስተምሮ ውጪ የቤተ ክርስቲያናችን ስም ይዘው የሚዘግቡም አሉ። የዚህ ጽሁፌ ዓላማ እነሱን መተቸት አይደለም ምክንያቱም እኔ ምንም አልሰራሁምና፤ የሚሰራ ሰው ደግሞ ስህተት አያጣም ከስሀተታቸው እንዲታረሙ ግን ከማሳሰብ ወደ ኋላ አልልም።

ቤተ ክርስቲያናችን እንደ ሌሎች አሐት አብያተ ክርስቲያናት ዘመኑንን በዋጀ መልኩ ወንጌልን ለዓለም የምታሰራጭበት እንዲሁም ስለ ቤተ ክርስትያናችን ሙሉ መረጃ የሚያሳይ የመረጃ መረብ መቼ ይሆን የምትዘረጋው?። መቼ ነው ቤተ ክርስቲያናችን ወንጌል ያላመኑትን በማሳመን “የዛሬ አምስት ዓመት ወይም የዛሬ አስር ዓመት የምዕመናን ብዛት በዚህ ያህል ቁጥር ማደግ አለበት በማለት የምታቅደው? ወይስ በየ መድረኩ እንደ ቅዱስ ፓትርያርኩ ቤተ ክርስቲያን ከልማት ጎን መሰለፍ አለባት ብቻ እያለች ልትኖር ነው። መልሱን ለእናተ ትቼዋልሁ።

No comments: