Saturday, December 11, 2010

ብፁዕ አቡነ ማትያስ አሜሪካ ገቡ

በኢትዮጵያ ኦርቶዶክስ ተዋሕዶ ቤተ ክርስቲያን የኢየሩሳሌም ሊቀ ጳጳስ ብፁዕ አቡነ ማትያስ እዚህ አሜሪካን ሀገር ገብተዋል:: ብፁዕነታቸው ከቅዱስ ሲኖዶስ አባላት መካከል ቤተ ከርስቲያን የገጠማትን ዘመን ያልዋጀ አሰራር በመተቸት የሚታወቁ ናቸው:: በባለፈው ዓመት ከአሜሪካ ድምጽ ሬድዮ ጋር ባደረጉት ቃለ ምልልስ እንደሰማናቸው ከሆነ ቤተ ክርስቲያን ዘመናዊ የአስተዳደር መርህ እንድትከተል እንዲሁም ደግሞ ቅዱስ ፓትርያኩ እየፈጸሙት ያለው ጥፋት እንዲያበቃ ጠንከር ያለ ትችት እና ተግሳጽ አሰምተው ነበረ::

ብፁዕነታቸው እዚህ የአሜሪካን ሀገር ሊቀ ጳጳስ በመሆን ረዥም ዓመታትን ያገለገሉ ሲሆን የዛሬ አራት ዓመት አካባቢ ወደ ኢየሩሳሌም ሀገረ ስብከት ተመድበው እዛው በማገልገል ላይ ናቸው::

ብፁዕ አቡነ ማትያስ ቤተ ክርስቲያናችን በዲያስጶራ በተለይም በሀገረ አሜሪካን የገጠማት ፈተና በደንብ እንደሚያውቁት ብዙዎች ይናገራሉ:: አሁን እዚህ አካባቢ የመጡበት ምክንያት በርግጠኝነት ባይታወቅም ብዙዎች የቤተ ክርስቲያን ልጆች ግን በአካባቢው ያለው የቤተ ክርስቲያን ፈተና ከዚሁ አካባቢ ሊቀ ጳጳስ ከብፁዕ አቡነ አብረሃም ጋር በመሆን መፍትሄ ያፈላልጋሉ የሚል ተስፋ አለ::

ብፁዕነታቸው ቤተ ክርስቲያኒቱ የገጠማትን ፈተና ለማስተካከል እያደረጉት ያለው የለውጥ እንቅስቃሴ ብዙዎቻችን እያስደሰተን ነው:: ነገር ግን እዚህ ሀገረ አሜሪካ የብፁዕ አቡነ ማትያስ በመባል የሚታወቀው መካነ ሕይወት ዲሲ መድኃኔ ዓለም ቤተ ክርስቲያን ላይ ባላቸው አቋም ብዙዎች ይተቿቸዋል:: ይህ አጥቢያ ቤተ ክርስቲያ በዲሲ እና አካባቢው ካሉት በቁጥር 20(ሃያ) በተለያየ መልኩ ወደ ሰባት አይነት አስተዳደር ያላቸው መካከል አንዱ ነው:: አጥቢያውም ለሀገረ ስብከት እውቅና ያልሰጠ ሲሆን፤ነገረ ግን በሥርዓተ ቅዳሴ ላይ የቅዱስ ፓትርያርኩ እና የአቡነ ማትያስ ሥም ብቻ ይጠራ ነበር፤ ከቅርብ ጊዜ ወዲህ ግን የዚሁ ሀገረ ስብከት ሊቀ ጳጳስ የብፁዕ አቡነ አብረሃም ስም ይጠራል::

መካነ ሕይወት መድኃኔ ዓለም ቤተ ክርስቲያን ሩብ ምዕተ ዓመት ያስቆጠረ አጥቢያ ሲሆን የራሱ የሆነ ህንፃ የሌለው እንዲሁም ደግሞ በሳምት አንድ ቀን ብቻ ለ3 ሠዓት ያህል አገልግሎት በኪራይ ቤት ውስጥ ይሰጥበታል:: በአስተዳደርም “በኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ሥር ነኝ” ይላል ነገር ግን ቅዱስ ሲኖዶስ ያዋቀረው ሀገረ ስብከት አይቀበልም::

ብፁዕነታቸው በዚህ ጉዞዋቸው ይህ አጥቢያ ቤተ ክርስቲያን ወደ ቤተ ክርስቲያን መዋቅር ስር ያስገቡታል የሚል ግምት አለ:: የብፁዕነታቸው ወደ ዋሽንግተን ዲሲ እና አካባቢው ሀገረ ስብከት መምጣት በሀገረ ስብከቱ እውቅና ይኑረው አይኑረው ለጊዜው ባይታወቅም፤ በአቀባበል ሥነ ሥርዓቱ ላይ ግን የሀገረ ስብከቱ ሊቀ ጳጳስ ብፁዕ አቡነ አብርሃም አልነበሩም::

No comments: