Wednesday, December 29, 2010

“ቆሞስ አዲስ ቤተ ክርስቲያን መባረክ አይችልም” ብፁዕ አቡነ ዘካርያስ

ቅዱስ ገብርኤል ሠለስቱ ደቂቅ(ሦስቱ ህፃናትን) ከእሳት ያወጣበት በቤተ ክርስቲያናችን የጊዜ ቀመር(አቆጣጠር) መሠረት በማድረግ ታህሣሥ ፲፱(19) ዓመታዊ የመታሰቢያ በዓል በመላው የኢትዮጵያ ኦርቶዶክስ ተዋሕዶ ቤተ ክርስቲያን በተለይም የቅዱስ ገብርኤል የመታሰቢያ ጽላት ባለበት አጥቢያ በደማቅ ተከብሮ ውሎዋል::

ይህንን ታላቅ በዓል አስመልክቶ በዚሁ በአሜሪካ በኦሃዮ ግዛት ውስጥ በደብረ ሰላም ቅዱስ ገብርኤል የኢትዮጵያ ኦርቶዶክስ ተዋሕዶ ቤተ ክርስቲያን ታህሣስ ፲፮(16) 2003 ዓ/ም ተከብሮ ውሎዋል:: በበዓሉም የኒዮርክ እና የሰሜን ምስራቅ ሀገረ ስብከት ሊቀ ጳጳስ ብፁዕ አቡነ ዘካርያስ ጨምሮ ከተለያዩ የአሜሪካ ግዛቶች ጥሪ የተደረገላቸው ካህናት ተገኝተዋል:: በዕለቱም የቤተ ክርስቲያኑ ሰበካ ጉባኤ ምክትል ሰብሳቢ አቶ ደሳለኝ ባቀረቡት የግማሽ ዓመት ሪፖርት ደብረ ሰላም ቅዱስ ገብኤል ቤተ ክርስቲያን በፌደራል መንግስ እና በኦሃዮ መንግስት እውቅና ማግኘቱን፤ 501 ተብሎ የሚታወቀው ከታክስ(ከግብር) ነጻ መሆኑን፤ እንዲሁም ደግሞ በባለቤትነት ደረጃ አጥቢያው የኢትዮጵያ ኦርቶዶክስ ተዋሕዶ ቤተ ክርስቲያን ንብረት መሆኑን የሚያረጋግጥ ሰነድ ማግኘታቸውን ገልጸዋል:: ይህ አጥቢያ ቤተ ክርስቲያን እንግዲህ በሰሜን አሜሪካ የኢትዮጵያ ቤተ ክርስቲያን የግማሽ ምዕተ ዓመት(50 ዓመት) ታሪክ ንብረትነቱ ሙሉ በሙሉ የኢትዮጵያ ኦርቶዶክስ ተዋሕዶ የሆነና በፈደራል መንግስ ደረጃ በኢትዮጵያ ቤተ ክርስቲያን ስም የተመዘገበ ከኒዮርክ ቅድስት ሥላሴ ቀጥሎ ሁለተኛ መሆኑ ነው::

በዚህ በሰሜን አሜሪካ ሁለት አሥርት ዓመታትን ያስቆጠሩ ብዙዎች አጥቢያ አቢያተ ክርስቲያናት በኪራይ ቤት ሲገለገሉ፤ ይህ አጥቢያ ቤተ ክርስቲያን ግን በተመሠረተ በአራት ዓመት ጊዜ ብቻ የራሱ የሆነ ህንፃ ቤተ ክርስቲያን መግዛቱ ብዙዎችን አስደንቆዋል:: ህንፃ ቤተ ክርስቲያኑ ፲፮ (16) ለተለያዩ አገልግሎት የሚውሉ ክፍሎች አሉት::







በዚሁ ክብረ በዓል ላይ የሀገረ ስብከቱ ሊቀ ጳጳስ ብፁዕ አቡነ ዘካርያስን ጨምሮ ዲ/ን ዳንኤል ክብረት(ከኢትዮጵያ)፤ ከዚሁ ከአሜሪካ ደግሞ ዲ/ን ዘላለም ወንድሙ (ከዲሲ ደብረ ሰላም ቅድስት ማርያም ቤ/ክ) እና ቀሲስ ዶ/ር መስፍን ተገኝ ትምህርት አስተምረዋል:: በዓሉም ለማክበር ከዋሽንግተን ዲሲ ፶፭(55) ሰው የያዘ አንድ አውብቶቢስ እና፲፪(12) ሰው የያዘ መለስተኛ መኪና፤ እንዲሁም ደግሞ ከሚቺጋን እና ከሌሎች ከኦሃዮ አቅራቢያ ያሉ ግዛቶች በርካታ  ምእመናን ተገኝተዋል::

በዕለቱም ብፁዕ አቡነ ዘካርያስ በሰሜን አሜሪካ የሚታየው ሥርዓት አለበኝነት በቆራጥ ዓላማ ለቤተ ክርስቲያን አንድነት በቤተ ክርስቲያን የአስተዳደር መዋቅር ሥር ሆነው የሚታገሉት የደብረ ሰላም ቅዱስ ገብኤል ቤተ ክርስቲያን አስተዳዳሪ ቀሲስ ያሬድ ገብረ መድኅንን አመስግነዋል:: እንዲሁም ሌሎች ሰባኪያን ወንጌል የቀሲስ ያሬድ ገብረ መድኅን ፈለግ እንዲከተሉ መልዕክት አስተላልፈዋል::

በመጨረሻም ሊቀ ጳጳሱ ያስተላለፉት ማሳሰቢያ አዲስ ቤተ ክስስቲያን መባረክ የሚችለው ሊቀ ጳጳስ፤ጳጳስ ወይም ኢጲስ ቆጶሱ ብቻ መሆኑን የቤተ ክርስቲያኒቷን የሥርዓት መጽሐፍ በማጣቀስ ተናግረዋል:: እንዲሁም ብፁዕነታቸው እንደገለጹት ከሆነ በቤተ ክርስቲያናችን ሥርዓት አዲስ ቤተ ክርስቲያን ሲመሠረት ቆሞስ መባረክ እንደማይችል እና ምእመናን “ቆሞስ ነኝ” እያሉ በተለያዩ አካባቢዎች “ቤተ ክርስቲያን ከፈትን” ብለው  ከሚያታልሉ መነኮሳት እዲጠበቁ አስጠንቅቀዋል:: 






  

  

No comments: