Tuesday, March 20, 2012

በፖሊስ ጥይት የቆሰሉት ተማሪዎች ሦስት ደርሰዋል

  •   ወደ ደብረ ዘይት ለሕክምና ተወስደዋል  
  • በፖሊስ ጥይት የቆሰሉት ተማሪዎች ሦስት ደርሰዋል

  •     አጋጣሚው ቃጠሎውን ከመከላከል ሊያዘናጋን አይገባም!!!

    READ IN PDF

ዘገባው የደጀ ሰላም ነው:: 
 በዝቋላ ገዳም የተነሣውን ቃጠሎ ለመከላከል ከተለያዩ አቅጣጫዎች ወደ ስፍራው ከተነቃነቁት አዳማ ዩኒቨርስቲ ተማሪዎች መካከል በፖሊስ ጥይት የቆሰሉት ተማሪዎች ሦስት መሆናቸው ተዘገበ፡፡ በተማሪዎቹ ላይ የደረሰው ጉዳት መንሥኤ በተማሪዎቹ እና በአንድ የኦሮሚያ ቴሌቪዥን ጋዜጠኛ መካከል የተፈጠረ አለመግባባት መሆኑን መዘገባችን ይታወቃል፡፡

እንደ ዐይን እማኞች ገለጻ ተስፋዬ ፈቃዱ ቡራዩ የተባለው ጋዜጠኛ ቃጠሎው በቁጥጥር ሥር እንደ ዋለ የቀጥታ ዘገባ እያስተላለፈ ነበር፡፡ ዘገባውን የሰሙት ተማሪዎች ጋዜጠኛው የተሳሳተ መረጃ እያስተላለፈ በመሆኑ እንዲያስተካክል ያሳስቡታል፤ መታወቂያውን ይጠይቁታል፤ ካሜራውም እንዳይቀርጽ ይከላከሉታል፤ በዚህም አለመግባባቱ በመካረሩ ግርግር ይፈጠራል፡፡
ጋዜጠኛውን አጅበው የመጡት 10 የኦሮሚያ ፖሊስ አባላትም ጥይት ይተኩሳሉ፤ በዚህ መካከል ነው ሦስቱ ተማሪዎች ተመትተው የቆሰሉት፡፡ ሁሉም ተማሪዎች የቆሰሉት ከጉልበታቸው በታች ሲሆን የአንደኛው ተማሪ ከባድ መሆኑ ተገልጧል፡፡ ወጣቶቹ በአዳማ ዩኒቨርስቲ የሦስተኛ እና የአራተኛ ዓመት የኤሌክትሪካል እና መካኒካል ኢንጂነሪንግ ተማሪዎች የሆኑና የማኅበረ ቅዱሳን ግቢ ጉባኤ አባላት ናቸው፡፡
በአሁኑ ወቅት በጥይት ተመትተው የቆሰሉት ተማሪዎች በፖሊሶቹ አማካይነት ወደ ደብረ ዘይት ለሕክምና መወሰዳቸው ተዘግቧል፡፡
የዝቋላ ገዳምን ቃጠሎ አስመልክቶ በትላንትናውና በዛሬው ዕለት በኢ.ቴቪ እና በአንዳንድ የኤፍ.ኤም ሬዲዮኖች የተላለፈው ዘገባ ሐቁን የሚያሳንስ፣ አደጋውን በሚገባ ያልተገናዘበ በመሆኑ በርካቶችን አስቆጥቷል፡፡ ብሔራዊው የቴሌቪዥን ጣቢያ በዛሬ የምሽት ዘገባው፡- ‹‹የዝቋላ ተራራ ቃጠሎ› ከበጋው የአየር ሁኔታ የተነሣ በሌሎችም የኦሮሚያ አካባቢዎች የተነሣው ቃጠሎ አካል መሆኑን፣ በቃጠሎው የአቡነ ገብረ መንፈስ ቅዱስ ቤተ ክርስቲያን አለመጎዳቱን፣ የክልል እና የፌዴራል ፖሊስ እንዲሁም የኦሮሚያ አደጋ መከላከልና ዝግጁነት ኮሚሽን ቃጠሎውን ለመከላከል የተባበረ ጥረት እያደረጉ ናቸው፤›› በሚል ዘግቧል፡፡
ቸር ወሬ ያሰማን

አሜን

1 comment:

Anonymous said...

በቃጠሎው የመንግስት እጅ ያለበት ይመስላል። ምክነያቱም በአሁኑ ሠዓት ሜዳና ተራራውን እናልማ በሚባልበት ጊዜ የለማው ሲወዱም ለምን ዝም ተባለ? እንደኔ አስተሳሰብ ለቃጠሎ መንስኤ እራሱ መንግስት ነው። ለዚህም ሁለት ምክነያቶች አሎት ብዬ አማናለሁ
1. እዚያ አካባቢ ያሉ ወንበዴዎች ደኑን ከለላ በማድረግ ከመንግስት አቅም በላይ ስለ ሆኑበት ይመስለኛል
2. መንግስት ሆን ብሎ ገዳሙን ለማዳከም የያዘዉ አቋም ሊሆን ይችላል
ለነዚህ ምክነያቶች የየራሳቸው ትውስታዎች አላቸው ለምሳሌ
1. ከዚህ በፊት በኦሮሚያ ክልል ባሌ ዞን ኦነግ የሚባል አሸባሪ ቡድን አለበት የተባለ ደን ሙሉ በሙሉ እንዲወዱም መደረጉ
2. በአሁኑ ሰዓት በዋልድባ ገዳም ላይ እየተደረገ ያለው ሴራ እና የጠቅላይ ቤተ ክህነት አባቶች ጆሮ ዳባ ልበስ ማለት ገዳማትን ማዳከም የመንግስት እቅድ መሆኑ ያሳያል
ስለዚህ እኛ ከእሳት ጋር ሳይሆን ግብ ግባችን ከጠቅላይ ቤተ ክህነት እና ከመንግስት ጋር ነው መሆን ያለበት። እኛ ከማን እናንሳለን ሌላ ስጡን አላልን የኛን አትኩብን እንጂ። እስቲ ሁላችንም እናስብበት እላለሁ
ሸመልስ ከሐዋሳ