Monday, May 14, 2012

"ከቅዱስ ሲኖዶስ ምልዓተ ጉባኤ ፍርድ እና ውሳኔ እንዲሰጠኝ" ቀሲስ ዶክተር መስፍን ተገኝ

TO READ THE LETTER IN PDF
በጥቅም የተሳሰሩ ሰዎችን ፍላጎት ለማንጸባረቅ የወጣው  ዜና ቤተ ክርስቲያን በአስቸካይ እንዲሰበሰብ በቅዳሜው ከሰዓት በኋላ የቅዱስ ሲኖዶስ ምልዓተ ጉባኤ ተወስኖ ነበረ:: አቡነ ፋኑኤል በቀሲስ ዶክተር መስፍን ተገኝ ላይ የጻፉትንም ደብዳቤ ወፈ ግዝት በማለት በከፍተኛ ወቀሳና ቁጣ ከብፁዓን አባቶች ደርሶባቸው እንደነበረ ተዘግቧዋል:: በምልዓተ ጉባኤው ሊወገዙ የሚገባቸው አቡነ ፋኑኤል” ሊሆኑ እንደሚገባ ትችት ተሰጥቷዋቸው እንደነበረም ከጉባኤው ምንጮች ተረድተናል ። ከፍተኛ ወቀሳ እና ቁጣ የደረሰባቸው አቡነ ፋኔኤል በኃፍረት ተሸማቀቀው እንደነበረ በወቅቱ በደጀ ሰላም ተዘግቦ ነበረ:: 

ቀሲስ ዶክተር መስፍን ተገኝ በልማት ኮሚሽን በሓላፊነት በነበሩበት ወቅት፣ እና ከዚህ በፊት በጤናና በኤች አይ ቪ መከላከያና መቆጣጠሪያ ሓላፊ በነበሩበት ወቅት ቤተ ክርስቲያን በዓለም አቀፍ እና ሀገር አቀፍ ደረጃ በመልካም ሥራ እንድትታወቅ ያደረጉ እንደነበረ ብዙኃኑ የጠቅላይ ቤተ ክህነት ሠራተኞች ይመሰክሩላቸው:: ቀሲስ ዶክተር መስፍን የነበሩበት መምሪያን ከመዘጋት ያዳኑ ዓመታዊ ገቢዉንም  1 ሚሊዮን ብር  ከማይሞላ  ወደ 20 ሚሊዮን  ማሳደግ የቻሉ ትጉህ ሠራተኛ እንደነበሩ የጠቅላይ ቤተ ክህነት ሰዎች ይናገራሉ::
 ቀሲስ ዶክተር መስፍን ኃይለ ጊዮርጊስ ጥላሁን በልማት ኮሚሽን በቤተ ክርስቲያኒቱ ሥም ይፈጽሙት የነበረውን ወንጀል  ግልጽ አድርገው የተወሳሰበ የጥቅም ትስሰር እንዲፈርስ ማድረጋቸውም የጠቅላይ ቤተ ክህነት ምንጮቻችን ይናገራሉ:: በቅዱስ ሲኖዶስ አባላት በመልካም ሥራቸው የሚታወቁት ቀሲስ ዶክተር መስፍን ተገኝ በአቡነ ጳውሎስ ከፍተኛ ግፊት መምሪያውን እንዲለቁ  ሲደረግ በእርሳቸው ጥረት ተገኝቶ የነበረው የውጭ ገንዘብ እርዳታ  በማለቁ  ፕሮግራሙ በመዘጋት ላይ ነው::  ቀሲስ ዶክተር መስፍን ሓላፊ በነሩበት ወቅት  ከ 30 በላይ የሚሆኑ ቅርንጫፍ ቢሮዎቸ  ነበሩ:: አሁን ግን ሁሉንም ቅርጫፍ ቢሮዎች የተዘጉ ሲሆን በርካታ ሰራተኞችም ተበትነዋል።

ይህ በዜና ቤተ ክርስቲያን የወጣው ዘገባ ፍጹም የሐሰት ውንጀላ በመሆኑን ዶክተር መስፍን ተገኝ ለቅዱስ ሲኖስ አባላት በጻፉት ደብዳቤ አጥብቀው ተቃውመውታል:: እንደ አስፈላጊነቱ በሕግ አግባብነት የጋዜጣው ዝግጅት አቀነባባሪዎችን በሕግ እንደሚጠይቁም የደረሰን መልዕክት ያስረዳል::
ቀሲስ ዶክተር መስፍን ለቅዱስ ሲኖዶስ የተጻፉት ደብዳቤ እንደሚከተለው  ቀርቦዋል::
+++
  
ቀን   ግንቦት 5 ቀን 2004 ዓ.ም  ቁጥር  EOTCDC/135/2004
ለኢትዮጵያ ኦርቶዶክስ ተዋሕዶ ቤተ ክርስቲያን                                                                                                                   ቅዱስ ሲኖዶስ አባላት

ጉዳዩ ፦    ከቅዱስ ሲኖዶስ ምልዓተ  ጉባኤ  ፍርድ እና ውሳኔ ንዲሰጠኝ ስለመጠየቅ  
በቅድሚያ የቅዱስ ሲኖዶስ ኣባላት የሆናችሁ አባቶቼ  ሁሉ  ቡራኬያችሁ  ይድረሰኝ እያልኩኝ ፤ ለቀደሙት አባቶቻችን  እውነተኛ የሃይማኖትን ገድል እንዲፈጽሙ ጽናትንና ትእግሥትን የሰጠ የቅዱሳን አምላክ እግዚአብሔር እናንተንም  በተቀመጣችሁበት ሐዋርያት መንበር  ለቤተ ክርስቲያን አንድነት እና ዘላቂ ሰላም   የሚጠቅም   እንዲሁም ቤተ ክርስቲያን ለገጠማትን  ዘርፈ ብዙ ችግር መፍትሔ ለመስጠት እንድትችሉ እግዚአብሔር ይርዳችሁ እላለሁ :፡
 
ይህንን ደብዳቤ ለመጻፍ የተገደድኩት  የቤተ ክርስቲያናችን  የመጨረሻ ውሳኔ ሰጪ አካል ከሆነው  ከቅዱስ ሲኖዶስ ምልዓተ ጉባኤ  ውሳኔ እና ፍርድ  እንድጠይቅ የሚያስገድድ ጉዳይ ስለገጠመኝ ነው ። እንደሚታወቀው የቤተ ክርስቲያንን እምነት ሥርዓትና  መዋቅር መጠበቅና ማስጠበቅ የሁላችን ግዴታ በመሆኑ ፤እኔም በምኖርበት በሰሜን አሜሪካ በዋሽንግተን ዲሲና አካባቢው ሀገረ ስብከት በተሰጠኝ ኃላፊነት መሰረት የቤተ ክርስቲያንን መዋቅር በመጠበቅ በጽናት የቆሙ የአብያተ ክርስቲያን አቋም እንዲገለጽ በማድረጌ  እና ይህንንም መዋቅር ለማፍረስ የተነሱት አቡነ ፋኑኤል የሚያከናውኑት  ከቀኖና ቤተ ክርስቲያን  የወጣ ተግባራቸው ጋር ተባባሪ ባለመሆኔ የተነሳ  በክፋትና በጥላቻ መንፈስ ተይዘው ስም ለማጥፋትና ባይሳካላቸውም በቱሩፋት የማከናውነውን የቤተ ክርስቲያን  አገልግሎት ለማደናቀፍ ደብዳቤ እስከመጻፍ ደርሰዋል ። ይህ የጥላቻ ተግባራቸው በዚህ አልበቃ ብሎ ለዚህ የክፋት ተግባራቸው ተባባሪ ከሆነው   ከኃይለ ጊዮርጊስ ጥላሁን  እና ከዜና ቤተ ክርስቲያን  አዘጋጆች ጋር በመሆን   ቤተ ክርስቲያን መሪና ተቆጣጣሪ የሌላት የጥቂት ግለሰቦች መፈንጫ የሆነች በሚያስመስል መልኩ  በዜና ቤተ ክርስቲያን  እኔን በተመለከተ የተሳሳተ እና በሀሰት ላይ የተመሰረተ ዘገባ እና  የስም ማጥፋት ተግባር ተፈጽሟል። 
ደሃ እንዳይበደል ፍርድ እንዳይጓደል ታላቅ መንፈሳዊ አደራ  የተሰጣችሁ አባቶች   ለዚህ ችግር በመንፈሳዊ አግባቡ  ከእናንተ የበለጠ መፍትሔ ሊሰጥ የሚችል አካል የለምና ፤ ይህንን የተፈጸመውን በደል ማለትም ሀሰትን መሰረት አድርጎ  በአቡነ ፋኑኤል የተጻፈብኝን ደብዳቤ  እና  አቡነ ፋኑኤልና  ኃይለ ጊዮርጊስ  ጥላሁን  በዜና ቤተ ክርስቲያን  እንዲወጣ ያደረጉት ዘገባ  በመመልከት  ቅን ፍርድ እንዲሰጠኝ ይህንን አቤቱታ አቀርባለሁ። የቅዱስ ሲኖዶስ ምልዓተ ጉባኤ በትክክል ጉዳዩን ከመረመረው አቡነ ፋኑኤል  በተደጋጋሚ በፈጸሙት  ቀኖና ቤተ ክርስቲያንን  የመተላላፍ ተግባር  በቅዱስ ሲኖዶስ አባላት ጭምር እየተነገራቸው የባሰ የቤተ ክርስቲያንን ሰላም የሚያናጋ ተግባር ውስጥ መገኘታቸው  ቅዱስ ሲኖዶስ እና ለቤተ ክርስቲያን ያላቸውን ንቀት የሚያመላክት ነው::
ስለዚህ የቤተ ክርስቲያንን ኃላፊነት ለመወጣት ባደረኩት ጥረት የተነሳ ለተፈጸመብኝ በደል አቡነ ፋኑኤል፤                             ኃይለ ጊዮርጊስ ጥላሁን ፤የዜና ቤተ ክርስቲያን አዘጋጆች እና  ከጀርባ ሆነው ይህ ጥፋት እንዲፈጸም ያደረጉ ሁሉ  በቅዱስ ሲኖዶስ ምልዓተ ጉባኤ  እንዲጠየቁና ለተፈጸመብኝ በደል  በመንፈሳዊ አግባቡ ተገቢው  ውሳኔ እንዲሰጠኝ ሃይማኖታቸው በቀና  በኒቅያ በተሰበሰቡ በ318 ሊቃውንት  ስም ፤ የኢትዮጵያ ቤተ ክርስቲያን ለመጠበቅና ለትውልድ ለማስተላለፍ ሰማዕትነትን በከፈሉ በኢትዮጵያን ቅዱሳን ስም  እጠይቃለሁ ። 
ቀሲስ ዶክተር መስፍን ተገኝ
የዋሽንግተን ዲሲና አካባቢው ሀገረ ስብከት  ጸሐፊ

ግልባጭ
ለብፁዕ ወቅዱስ ፓትርያርክ ልዩ ጽ/ቤት                                                                                                                  ለቅዱስ ሲኖዶስ ጽ/ቤት
ለመንበረ ፓትርያርክ ጠቅላይ ጽ/ቤት

1 comment:

Anonymous said...

ayezohe wendemachen gezaw yewerebelawoch new ewnetena negat eyadere yeteral newena ante bereta