Monday, May 28, 2012

የማኅበረ ቅዱሳን የአሜሪካ ማዕከል ዓመታዊ ጉባኤ ተካሔደ

ዘገባውን የወሰድነው ከማኅበረ ቅዱሳን የአሜሪካ ማዕከል ድረ ገጽ ላይ ነው::
 20ኛ የምሥረታ በዓሉም ተከበረ
(ዴንቨር፣ ኮሎራዶ)፦ በኢትዮጵያ ኦርቶዶክስ ተዋሕዶ ቤተ ክርስቲያን ማኅበረ ቅዱሳን የአሜሪካ ማዕከሉ በየዓመቱ የሚያካሒደው ጠቅላላ ጉባዔ የዚህ ዓመት ስብሰባ ግንቦት 18-19/2004 ዓ.ም በኮሎራዶ ግዛት የዴንቨር ከተማ ተካሔደ። በመላው አሜሪካ ከሚገኙ 11 ንዑሳን ማዕከላት (ቀጣና ማዕከላት) እና 2 ግንኙነት ጣቢያዎች የመጡ አባላት በተሰበሰቡበት በዚህ ጉባኤ ላይ ከዋናው ማዕከል የተወከሉ ሦስት ልዑካን፣ የካሊፎርኒያና የምዕራብ ስቴቶች ሀገረ ስብከት ሥራ አስኪያጅ ሊቀ ካህናት ኃ/ሥላሴ ዓለማየሁ፣ አበው ካህናት እና ተጋባዥ እንግዶች የተገኙ ሲሆን በዓመታዊ አገልግሎት ሪፖርትና ዕቅድ እንዲሁም በሌሎች ወቅታዊ ጉዳዮች ላይ ሰፊ ውይይት ተካሒዷል።


 በቅዳሜ ውሎው የ2003-2004 ዓ.ምሕረት የአገልግሎት ዘመን የአገልግሎት አፈጻጸም ሪፖርት ከቀረበ በኋላ ውይይት ተደርጎበታል። ዓመቱ ማኅበሩ አገልግሎት የጀመረበት 20ኛ ዓመት እንደመሆኑ ያንን ለማዘከር የተዘጋጁ ሁለት ጥናታዊ ጽሑፎች ቀርበዋል። “ማኅበረ ቅዱሳን በ20 ዓመት አገልግሎቱ ያተመው አሻራ” (The Legacy of Mahibere Kidusan) እና “የማኅበረ ቅዱሳን አገልግሎት በሰሜን አሜሪካ” የሚሉት ጥናታዊ ጽሑፎቹ ማኅበረ ቅዱሳን በሰጣቸው አገልግሎቶች እና ለኢትዮጵያ ቤተ ክርስቲያን ባበረከታቸው ዐበይት ነጥቦች ላይ ሐሳቦች የቀረቡ ሲሆን በሰ/አሜሪካም ደረጃም ያለፈበትን፣ የሠራውን እና ሳይሠራው የቀረውን በዝርዝር በማንሣት ውይይት ተደርጎበታል።

በቅዳሜው ታሪካዊ ዳሰሳ ላይ ተመርኩዞ በቀጠለው የእሑዱ ጉባኤ ማኅበሩ በተለይ በሰሜን አሜሪካ ሊከተለው ስለሚገባው የአገልግሎት መስመር ስልታዊ ማሳያዎች ቀርበው ውይይት ተደርጎባቸዋል። በሚቀጥለው ዓመትም መሥራቸው የሚገባው አገልግሎት ዝርዝር ቀርቦ ጉባኤው አጽድቆታል።

ለጉባኤው ድምቀት ሰጥተው ከነበሩት አጀንዳዎች አንደኛው በሆነው በዋናው ማዕከል ልዑካን ሪፖርት ማኅበሩ በመላው ዓለም እየሰጠ ባለው አገልግሎት የፈጸማቸው ተግባራት የቀረቡ ሲሆን ጉባኤተኛው በከፍተኛ ደስታ ተቀብሏቸዋል። በጠረፋማ የአገራችን አካባቢዎች እየተሰጠ ያለው ሐዋርያዊ አገልግሎት እና ውጤቱ በእጅጉ እንዳስደሰታቸው የገለጡት ሊቀ ካህናት ኃ/ሥላሴ ዓለማየሁ የሦስተኛውን ፓትርያርክ የብፁዕ ወቅዱስ አቡነ ተክለ ሃይማኖትን የዘወትር ጥያቄ በማስታወስ አስተያየታቸውን ሰጥተዋል። ቅዱስነታቸው በየዓመቱ በሚደረገው የመንበረ ፓትርያርኩ የሰበካ ጉባኤ ስብሰባ ላይ “የዳር አገሯ ቤተ ክርስቲያን እንዴት ናት?” ይሉ እንደነበር በማስታወስ በጠረፋማ አካባቢዎች የሚካሔደው ሐዋርያዊ አገልግሎት ታላቅ ርምጃ መሆኑን ገልጸዋል። “ዳሩ እሳት፣ መሐሉ ገነት” የሚለውን አባባል እውነታ በማጉላት “ዳሩ ሁል ጊዜ እሳት መሆን የለበትም፤ ዳሩንም ገነት ማድረግ ያስፈልጋል” ሲሉ አባታዊ መመሪያ ሰጥተዋል።

ጉባኤው 20ኛውን ዓመት ለማዘከር ባዘጋጀው መርሐ ግብር ከማኅበሩ ምሥረታ ጀምሮ ለነበሩ አባላት ማስታወሻ ተሰጥቶ ታሪኩን፣ አነሣሡን እና አገልግሎቱን እንዲሁም አባላቱ የከፈሉትን መሥዋዕትነት አስታውሷል። ከ1977 ዓ.ም ጀምሮ እግዚአብሔር ለዚህ ትውልድ ያደረጋቸውን ገቢረ ተዓምራት በማንሣት “እግዚአብሔር ከእኛ ጋር” ነው ሲል ጉባኤተኛው ስብሐተ እግዚአብሔር አድርሷል። ታሪኩን ያስታወሱትና ልብ የሚነካ እና አባላቱን በዕንባ እንዲሰሙ ያደረገ ትምህርት የሰጡት መልአከ ሰላም ቀሲስ ደጀኔ ሺፈራው “ዝንቱ ነዳይ ጸርኀ ወእግዚአብሔር ሰምዖ - ይህ ችግረኛ ጮኸ እግዚአብሔርም ሰማው” (መዝ. 33፤) ያለውን የቅ/ዳዊት ቃል አንስተው “ዝንቱ ማኅበረ ቅዱሳን ጸርኀ ወእግዚአብሔር ሰምዖ፤ ይህ ችግረኛ ማኅበረ ቅዱሳን ጮኸ - እግዚአብሔርም ሰማው” ሲሉ አስተምረዋል።

ጉባኤው እስከ እኩለ ሌሊት በዘለቀው ረዥም የዕለተ እሑድ ጉባኤው ወሳኝ ጉዳዮች ላይ ውሳኔዎችን በማሳለፍ፣ አዲስ ሥራ አስፈጻሚ በመምረጥ እና በአዲስ መንፈስ ለቅድስት ቤተ ክርስቲያን የተገባውን ቃል ኪዳን በማደስ በሚቀጥለው ዓመት በሜኔሶታ በሚደረገው 15ኛው የማዕከሉ ጉባኤ ላይ ለመገናኘት በመቅጠር “ያብጽአነ አመ ከመ ዮም” በሚል መዝሙር ተፈጽሟል። የዓመት ሰው ይበለን።


2 comments:

Anonymous said...

Glory be to God. Dear Brothers I am happy with what you have been doing and what you planned to do. I did not think this way when the founding brothers/sisters started to Go to USA. Now I understood it was for a Good and God's reason. Be strong united.

Anonymous said...

yebetekiristian gudoch ehen serahu eyalachihi lelawn tatefalachihu hulum sirachihu yetegelete ena yemiastemir yihun enge kekifat gar teketilo aymta.