Sunday, May 13, 2012

የቅ/ሲኖዶስ መደበኛ ስብሰባ ሦስተኛ ቀን የቀትር በኋላ ውሎ

አቡነ ጳውሎስ ከፕሮቴስታንታዊ ተሐድሶ መናፍቃን ጋራ ማበራቸውን የቅ/ሲኖዶስ አባላት ገለጹ  
መሉ ዘገባው የደጀ ሰላም ነው::
የቅ/ሲኖዶስ መደበኛ ስብሰባ ሦስተኛ ቀን የቀትር በኋላ ውሎ
·  ቅዱስ ሲኖዶስ በቀጣይ ለሚኖረው አመራር የመላው ካህናትና ምእመናን ጸሎትና ሁለንተናዊ ድጋፍ እንዲደረግለት ተጠይቋል
·    በአባ ጳውሎስ፣ አባ ፋኑኤልና ኀይለ ጊዮርጊስ ጥላሁን ምክርና ኮሚሽን አድራጊነት የተጻፈው የዜና ቤተ ክርስቲያን ጋዜጣ ርእሰ አንቀጽ እና ዘገባ በፈጠረው ቁጣ ሳቢያ የቅዱስ ሲኖዶስ ስብሰባ ተቋረጠ
·        ጋዜጣው በስብሰባ መካከል መሰራጨቱና ባተኮረበት ይዘት ብፁዓን አባቶችን ለማሸማቀቅ ተብሎ መዘጋጀቱን የቅዱስ ሲኖዶስ አባላት ተናግረዋል
·      የጋዜጣው ርእሰ አንቀጽና ዘገባዎች አባ ጳውሎስ በስብሰባው እንዲያዙላቸው የሚፈልጓቸውን አጀንዳዎች ከአባ ጳውሎስ “የፓትርያርክነት ዐምባገነንነት” ፍላጎት አንጻር የማብራራት ግብዝነት የሚታይበት ነው
·   አባ ጳውሎስን ከፓትርያርክነት ማዕርጋቸው በሚያወርዷቸው የቃለ መሐላ ጥሰትና የታማኝነት ማጣት ጉዳዮች ዙሪያ ጠንካራ ውይይት ተጀምሯል
·   የአባ ጳውሎስ ግብረ በላዎች ንት ማምሻውንና ዛሬ ቀን በአባቶች ማረፊያ ቤት እየተዘዋወሩ በማስፈራራት ጽናታቸውንና አንድነታቸውን ለማላላት እየሞከሩ ነው፤ እጅጋየሁ በየነ፣ ኀይለ ጊዮርጊስ ጥላሁንና ለጊዜው ስማቸው ያልተጠቀሱ ግለሰቦች ይገኙባቸዋል
·      መደበኛ ስብሰባው ነገ ሰኞ ይቀጥላል

(ደጀ ሰላም፤ ግንቦት 5/2004 ዓ.ም፤ May 13/ 2012)፦  
ንት፣ ግንቦት 4 ቀን 2004 ዓ.ም ከቀትር በፊት በነበረው የቅዱስ ሲኖዶስ ስብሰባ ርእሰ መንበሩ አባ ጳውሎስ በምልአተ ጉባኤው ስምምነት የተደረሰባቸውን አጀንዳዎች ባለመቀበል ኾነ ብለው በያዙት ግትርነት የተነሣ ብዙኀኑ አባላት ከቀትር በኋላ ሌላ ሰብሳቢ መርጠው ውይይታቸውን ለመቀጠል ወስነው ነበር የተነሡት፡፡
በዚህ መሠረት የቅዱስ ሲኖዶሱ አባላት ከቀትር በኋላ ስብሰባውን ለመቀጠል ወደ አዳራሹ ሲገቡ የዜና ቤተ ክርስቲያን ጋዜጣ በየመቀመጫቸው አንጻር ተቀምጦ ያገኛሉ፤ ፓትርያርኩም በኮሚቴው የተዘጋጁትን አጀንዳዎች እንደሚቀበሉ መስለው ተላስልሰው በመቅረባቸው ምልአተ ጉባኤው በእርሳቸው ርእሰ መንበርነት እየተመራ በተ.ቁ (2) ላይ የተመለከተውን የቅዱስ ሲኖዶሱን ዋና ጸሐፊ ብፁዕ አቡነ ሕዝቅኤልን ሪፖርት አዳመጠ፤ እግረ መንገዳቸውንም ጋዜጣውን እንደ ዋዛ መመልከታቸውን አላቆሙም ነበር፡፡
ሪፖርቱ በንባብ ተሰምቶ ከተጠናቀቀ በኋላ ውይይት ከመጀመሩ በፊት ለሻሂ ዕረፍት የተነሡት አባቶች ግን ጋዜጣው በያዘው ‹ቁም ነገር› ላይ መመካከር ያዙ፤ ምክክሩም አቡነ ጳውሎስ ከስብሰባው ቀደም ብለው ከዋሽንግተን ወደ አገር ቤት ከመጡት አባ ፋኑኤል እና ኀይለ ጊዮርጊስ ጥላሁን ጋራ በማበር የጋዜጣውን አዘጋጆች እና ጋዜጣው በሚዘጋጅበት መምሪያ ውስጥ በሓላፊነት የሚገኙ ሌሎች ግለሰቦችን በቅጥረኝነት በመጠቀም የሠሩት መኾኑን ይደርሱበታል፡፡
ከሻ ዕረፍት መልስ የስብከተ ወንጌል እና ሐዋርያዊ ተልእኮ መምሪያ ሊቀ ጳጳስ ብፁዕ አቡነ ማርቆስ ስለ ጋዜጣው ዝግጅት ምንም እንደማያውቁና ሌሎች አጀንዳዎች ወደ ኋላ ቀርተው ምልአተ ጉባኤው በዚሁ ጉዳይ እንዲነጋገር ይጠይቃሉ፡፡ ከዚህ በኋላ በቤቱ የነበረው ድባብ በፓትርያርኩ እና በአባ ፋኑኤል ላይ ባነጣጠረ የተግሣጽ መአት የተሞላ ነበር፡፡ አባ ጳውሎስም ይኹኑ አባ ፋኑኤል የሠሩትን ያውቃሉና አንገታቸውን አቀርቅረው ተግሣጻቸውን ከመቀበል ውጭ ትንፍሽ ያሉት ነገር አልነበረም፡፡
በተግሣጹ አባ ጳውሎስ ከተሐድሶ መናፍቃን ጋራ በግልጽ በማበር አባቶች በወቅታዊ ጉዳዮች በተቀረጹት አጀንዳዎች ዙሪያ ያላቸውን አንድነት እና የዓላማ ጽናት በመሸርሸር ለማሸማቀቅ (በግብር የሚመስሏቸው የመፍቀሬ ፕሮቴስታንታዊ ተሐድሶ ብሎጎች እንደሚያደርጉት) አስበው እንዲፈጸም በማዘዝ እጃቸው እንዳለበት ተነግሯቸዋል፤ አባ ፋኑኤልም “መወገዝ ያለብኽ ሕገ ወጡ አንተ ነኽ፤ በሌላው ሊቀ ጳጳስ ሀገረ ስብከት ገብተኽ ክህነት የምትሰጥ፤ አንተ ብሎ ክህነት ያዥ¡” በሚሉና ሌሎችም ኀይለ ቃላት የድርሻቸውን አግኝተዋል፡፡
ነገ ሰኞ በሚቀጥለው ስብሰባ ቀዳሚው አጀንዳ የጋዜጣው አዘጋጆች ተጠርተው የሚጠየቁበት እና ለዝግጅቱ ሓላፊነት የሚወስደው አካል ተለይቶ አስፈላጊው ውሳኔ የሚሰጥበት እንደሚኾን ተጠቁሟል፡፡ “ትልቁ ቁም ነገር የሃይማኖት ጉዳይ ነው፤ ቤተ ክህነቱ በተሐድሶዎችና ጥቅመኞች ለመወረሩና በእነርሱ ተጽዕኖ ሥር ለመውደቁ ከዚህ በላይ ማስረጃ አያስፈልገንም፤” ብለዋል አንድ አባት፡፡ ስብሰባው በጋዜጣው ሳቢያ ያለ ሰዓቱ መቋረጡን ተከትሎ ሁሉም አባቶች በየማረፊያ ቤታቸው ትንት ማምሻውንና ዛሬ እርስ በርስ መመካከራቸውን ቀጥለዋል፡፡
“በአባቶች መካከል በተፈጠረው አንድነትም ይኹን በግቢው የአባ ጳውሎስ ግብረ በላዎች በሚያደርጉት መራወጥ በ2001 ዓ.ም የነበረው ኹኔታ ተመልሶ የመጣ ይመስላል፤” ያሉ አስተያየት ሰጭዎች ብፁዓን አባቶች የቅዱስ ሲኖዶሱን ሥልጣን በመጠቀም በስብሰባዎች ላይ አባ ጳውሎስ የሚፈጥሯቸውን የማዘናጊያ አካሄዶች ወጊድ እያሉ ጉዳዮች በሚገባቸው ጥልቀት እየተብላሉና በውሳኔ እየታሰሩ መሄዳቸውን እንዲያረጋግጡ መክረዋል፡፡
ጋዜጣው ምን እንደጻፈ፣ ስለምን እንደጻፈ ሊያውቅ እና ሲቆጣጠርም ይገባ የነበረው የስብከተ ወንጌልና ሐዋርያዊ ተልእኮ መምሪያ ሊቀ ጳጳስ ስለ ዝግጅቱ አያውቁም፤ የጋዜጣው ዋና አዘጋጅም “በስሜ ተነግዶብኛል” እያሉ ሲሆን ጋዜጣው ከመሰራጨት እንዲታገድና አባ ጳውሎስን ጨምሮ አዘጋጆቹ በቅዱስ ሲኖዶስ እና በሕግ አግባብ የሚጠየቁበት ዝግጅት እየተደረገ ነው ተብሏል።
ጋዜጣው ርእሰ አንቀጽ እና ዜና ዘገባ የሚከተሉትን ዋና ዋና ሐሳቦችለማንሣት ይሞክራል፦
·         በብፁዓን አባቶች ላይ ደግሞ በሥርዐተ ሢመት (ምርጫ፣ ዕድሜ፣ የትምህርት ደረጃ)፣ በሀብት ክምችትና ውርስ እንዲሁም በውጭ ዜግነት ከጊዜው በጣም የዘገየ፣ አባ ጳውሎስን ከተመሳሳይ ወቀሳ ነጻ ያደረገ የጩኸቴን ቀሙኝ ክስና ግብዝነት የተሞላበት ጽሑፍ አቅርቧል፡፡
·         የጥቅምቱ ቅዱስ ሲኖዶስ ለፕሮቴስታንታዊ ተሐድሶ ፕሮጀክት መንገድ ጠራጊ የኾነው “የውጭ ጉዳይ ተጠሪ ጽ/ቤት” ተብዬ ከቃለ ዐዋዲውና ከሕገ ቤተ ክርስቲያን ጋራ የሚፃረር መዋቅር በመኾኑ እንዲዘጋ ያሳለፈውን ውሳኔ በመናቅ ነውረኛውን ኀይለ ጊዮርጊስ ጥላሁን “በሰሜን አሜሪካ የኢ/ኦ/ተ/ቤ/ክን የውጭ ጉዳይ ተጠሪ ጽ/ቤት ባለሙሉ ሥልጣን ዋና ሓላፊ” በማለት ይጠራዋል (በጋዜጣው የፊት ገጽ የወጣውንና አባ ፋኑኤልና ኀይለ ጊዮርጊስ ጥላሁን ‹በአጭር ጊዜ ስላሳዩት የሥራ ፍሬ› የሚናገር ‹ዜና› ራሱ እንዳረቀቀው ይነገራል፡፡)
·         ከግማሽ ምእት በላይ በሰሜን አሜሪካ ሲከናወን የቆየውን የቤተ ክርስቲያን አገልግሎት በመዘንጋት ቀኖና ቤተ ክርስቲያንን ተላልፈው በሌሎች ሊቃነ ጳጳሳት አህጉረ ስብከት ክህነት በመስጠትና ማእከላዊ አሠራርን በመናድ የሚታወቁትን አባ ፋኑኤልን “በሰሜን አሜሪካ ሥራ አሁን ገና ሥራ እንደተጀመረ እና የታሪክ እመርታ እንደታየ” በመተረክ ይቀጥፋል፡፡
·         የዋሽንግተን ዲሲና አካባቢው ሀ/ስብከት ሥራ አስኪያጅ የኾኑትን ቀሲስ ዶ/ር መስፍን ተገኝ “በልማትና ክርስቲያናዊ ተራድኦ ኮሚሽን የኤች.አይ.ቪ/ኤድስ መከላከያና መቆጣጠሪያ ቢሮ ሲሠሩ ዛሬ መንግሥት በአሸባሪነት የፈረጃቸውን ግለሰቦች በድርጅቱ ውስጥ በመሰግሰጋቸው ተነቅቶባቸው እንደተባረሩ” በመጥቀስ ‹ክስና ማስረጃው› የማይገናኝ ውንጀላ ይናገራል፤ አያይዞም በቤተ ክህነቱ ሠራተኞች አገላለጽ አባ ጳውሎስና ግብረ በላዎቻቸው መጥምጠው እንዳዳከሙት ለተገለጸው ኮሚሽን “የተሳሳተ መረጃ ለለጋሽ ድርጅቶች በመስጠት የኤች.አይ.ቪ/ኤድስ መከላከያና መቆጣጠሪያ ቢሮ እንዲዘጋ ያስደረጉት ቀሲስ ዶ/ር መስፍን ናቸው፤” በሚል ክሱን ይቀጥላል፤ ሊቀ ጳጳሱ በሌላቸው ሥልጣን በቀሲስ ዶ/ር መስፍን ላይ አስተላልፌዋለኹ ለሚሉት ከንቱ ‹ውግዘት›ም አጽድቆት ይሰጣል፡፡
በአጠቃላይ ጋዜጣው በአቡነ ፋኑኤል ጉቦ እንደተዘጋጀ ምንም አላጠራጠረም። በተግሳጽ መዶሻ ሲወቀሩ ያመሹት አቡነ ፋኑኤልም አልካዱም። ጥያቄው ፓትርያርኩ እንዴት እንዲህ ያለ ነገር ሊፈቅዱ ቻሉ የሚለው ተመሳሳይ ጥያቄ ነው። ራሳቸው የሚመሯቸውን ብፁዓን አበው ሊቃነ ጳጳሳት በጎን በጋዜጣ ማስደብደብ ምን የሚሉት “ፓትርያርክነት” ነው? ፓትርያርክነታቸውስ ለማን ነው? በ2001 ዓ.ም በቅ/ሲኖዶስ ጉባኤ የተቃወሟቸው አባቶች ቤታቸው በሌሊት ከመሰባበበሩ ጋር ያላቸውን ቁርኝት ይህ ሕገ ወጥ ጋዜጣ አዘገጃጀት ግልጽ አያደርገውምን?
ፓትርያርኩ ቅ/ሲኖዶሱን ባለመስማት ካመጹ ቆይተዋል። የዚህ ሕገ ወጥነታቸው ምልክት ደግሞ ቦሌ መድኃኔ ዓለም ቤተ ክርስቲያን ፊት ለፊት የተደነቀረው ሀውልታቸው ነው። ቅ/ሲኖዶስ እንዲነሣ ቢወስንም በርሳቸው አምባገነንነት ይኸው እንደተገተረ አለ። ውሳኔያቸውን በተግባር ለመግለጽ ምንም አቅም ያጡት አባቶች ከዚህ በኋላ ለመናገር ፈቃደኛ ባይሆኑ ይፈረድባቸዋልን? የወሰኑትን ውሳኔ ቤተ ክህነቱ ለማስፈጸም የማይፈልግ ከሆነ ምእመናን ሊያግዟቸው አይገባምን? ይህንን ጣዖት መሰል ሕገ ቤተ ክርስቲያንን የጣሰ ሀውልት ምእመናን ነቃቅለው ሊጥሉ፣ አባቶቻቸውን ሊያጠቋቸው ከሚመጡ ወንበዴዎች እና “ዶላር-አምላኩ” የዲሲ ጆቢራዎች ሊከላከል አይገባውምን?

ደጀ ሰላም ባለፉት ዓመታት ስታደርግ እንደቆየችው ሁሉ በዚህ ዓመትም ስብሰባዎቹን “እንደወረደ” ሪፖርት ታደርጋለች። ይህንን የምታደርገው ግን እገሌ እንዲህ አሉ፣ እገሌ እንዲህ ሠሩ” በሚለው እንድንዝናና ሳይሆን የሰማነውን ሰምተን ፣ ማድረግ ያለብንን ደግሞ እንድናደርግ ነው። ጎራው ለይቷል። ቤተ ክርስቲያን አፍራሾቹ፣ ጉበኞቹ፣ ዘራፊዎች እና የቤተ ክርስቲያን አጥፊዎቹን በግልጽ አውቀናቸዋል። ስለነርሱም ብዙ ብዙ ብለናል። አሁን ግን ይበቃናል። አባቶቻችን እየያዙት መጡትን አቋም በመደገፍ “አይዟችሁ” ልንላቸው ይገባል። ጎናቸውም እንቆማለን። መንግሥትም ቢሆን ይህንን ሕገ ወጥነት በመደገፍ ፖሊሱን እና ወታደሩን፣ ጥይቱንና ዱላውን የሚልክ ከሆነ ምእመናን ለሃይማኖታቸው መስዋዕትነት ለመክፈል ተዘጋጁ መሆኑንም ማሳየት ይገባቸዋል። ቅ/ጳውሎስ በፊልጵስዩስ መልእክቱ እንዳስተማረን “ይህ ስለ ክርስቶስ ተሰጥቶአችኋልና፤ ስለ እርሱ መከራ ደግሞ ልትቀበሉ እንጂ በእርሱ ልታምኑ ብቻ አይደለም” (1፥29)። እናምናለን፣ ስለ ማመናችን የሚመጣብንን መከራም በጸጋ እንቀበላለን። ከአባቶቻችን ጋር በመቆም ቤተ ክርስቲያናችንን እንታደጋለን። እግዚአብሔር ይርዳን።
ቸር ወሬ ያሰማን፣ አሜን
ሪፖርታዡ ይቀጥላል፤ ተከታተሉን።

2 comments:

Dillu Zegeye said...

What can I say other than all mighty God be with those who defend his holy church ! Keep defending our holy and ancient church as you have been doing this for the last ...years.

Girum Tibebu said...

የመጨረሻው ዘመን : የሀሳዊ መሲሁ ዘመን ፡ በተቀደሰው ስፍራ የረከሰ ነገር የሚደረግበት ዘመን ፡ ፍርድ ከኧግዚአብሔር ቤት የሚጀምርበት ዘመን አሁን ነው ኧንግዲህ!!! ወንጌል ህይወት ኧንጂ ታሪክ ብቻ ስላልሆነች ኧውነተኛ ክርስቲያኖች ነን ካልን ወንጌሉ በሚያስተምረን መሰረት መተግበር ይገባናል:: በኧግዚአብሔር ስም የሚመራን ኧውነተኛ ሀዋርያ ባለመኖሩ በአንድነት ሆነን ለቤተክርስቲያን ችግር መፍትሄ ለመስጠት ባንችልም በየግላችን አብዝተን መጾምና መጸለይ ይገባናል::